Ungdomsbedrifta ”Globe Connections” ved Haram vidaregåande skule tok del under læreplankonferansen ”med innsIKT og utsIKT til ny læreplan” som samla 300 lærarar og skoleleiarar frå heile Møre og Romsdal 26.–-27. april 2005.
Biletet:
Malin (t.v.) og Maren frå Globe Connections
Tekst og bilete: Inger Moene
Saman med lærar Torleiv Austnes og medelevar i studio ved Haram vgs. viste dei oss ulike bruksområde for desse samhandlingsverktya. Elevane, som har faget IBD (International Business Development), har starta ungdomsbedrifta Globe Connections. Ein del av konseptet er å halde kurs i bruk av kommunikasjonsverkty som MSN, Netmeeting og Skype.
Gode kommunikasjonsverkty
– Desse verktya kjem spesielt til sin rett over store avstandar, seier jentene entusiastisk. Dei presenterte i løpet av ein knapp time under konferansen fleire gode kommunikasjonsverkty – verkty som er gratis og lett tilgjengelege, og som vert altfor lite brukte. Dei legg til at ein enkelt kan samarbeide mellom to ulike lokalitetar med å utarbeide eit felles dokument, dele dokumentet og samtidig ha kommunikasjon med lyd og bilete. Dette demonstrerte dei med hjelp av to datamaskiner, nettkamera, mikrofon og to videokanonar. Det eine skjermbiletet kalla dei samhandlingsområdet. Det andre viste elevane som sat i studie ved Haram vidaregåande skule.
Bruksområda
Studio er eit samarbeid mellom kommunen og næringslivet i Haram. For bedriftene er dette interessant på fleire måtar. Elevane får kompetanse, og dei lærer seg å tenke i større samanhengar. – Vi ser ei fantastisk utvikling innan lyd og bilete på Internett, seier lærar Torleiv Austnes. Vi er enno berre i startgropa, men dette kjem til å få mykje merksemd i tida som kjem. Då har vi opparbeid pedagogisk innhald som kan fylle verktya, seier han.
Framtidsvisjon
Skolen har i dag eit samarbeid med NTNU i Trondheim. – I dette samarbeidet vert studioet flittig nytta, seier leiar av Haram innovasjonsstudio, Guttorm Ulla. Han fortel at dei har som framtidsvisjon at dette verktyet skal kunne auke fagtilbodet ved skolen. Elevane lærer mykje gjennom å nytte digitale verkty. Den virtuelle kvardagen er i framtida kostnadseffektiv gjennom at ein slepp å reise for å arrangere møte. Maren og Malin presiserer kor viktig det er at ein har møttest andlet til andlet før ein tek til med nettbasert samarbeid. Elles vert det vanskeleg å opprette ein god dialog, seier dei.
Samarbeidsorientert læring
Så viser dei oss korleis dei samarbeider om eit dokument. Maren må tilstå at ho burde vore i Brattvågen og jobba med særoppgåva si om norsk fiskeri og fiskerigrensa. I staden er ho her i Molde på konferanse. – Ikkje problem, seier dei frå studio i Haram. Dei hentar opp oppgåva frå hennar område på datanettverket ved skolen. Deltakarane i salen ser at kartet over norske havområde kjem opp på storskjermen. Elevane i studio lurer på kva ho så treng hjelp til? – Eg må teikne inn fiskerigrensene, seier Maren. Elevane byter på å ha kontroll over dokumentet. Slik samarbeider dei på kryss av stor avstand om oppgåva
Malin og Maren avsluttar med å fortelje at ”Globe connections” gjerne held kurs i korleis ein kan ta slike verkty i bruk i samhandling.
Ungdomsbedrifta Globe Connections under konferansen.
Til nettstader: