Sáme pedagogalasj fáhkabiejve

Sáme sierrapedagogalasj værmádahka gåhttju duv Sáme pedagogalasj fáhkabiejvijda 22.-23.04. 2020 Guovdagæjnnuj 

Tiebmá Sáme pedagogalasj fáhkabiejvijn 2020 le «sámemánáj,- ja nuoraj bajássjaddamdille, giella ja teknologijja.  Ålleslasj ratjástibme mánájda ja nuorajda le tiebmá vuostasj biejve . Lågådalle galggi ságastit duola degu giela birra, mánáj rievtesvuodaj birra, iellemrijbadime birra, gåktu åhpadimev hiebadit ja giella, - ja identitehta åvddånime birra moattegielak åhpadimen. Maŋemus oasen vuostasj biejve dållap parallælla sesjåvnåjt dáj tiemáj; giellalávggom, fáhkaådåsduhttem, guoradallamvædtsaga ja juojgga ja subtsastallamdáhpe åhpadimen. Tiebmá nuppat biejve l digitála didáktalasj hábbmim. 

Fáhkabiejve dåladuvvi fært nuppát jage Sámeednama iesjgudik guovlojn. Ulmme konferánsajn le tjoahkkit pedagogalasj barggijt sáme oahppoinstitusjåvnåjs Sámeednama iesjgudik guovojs, vaj bessi fágalasj máhtudagáv åvdedit, tjadnat aktijvuodajt ja oahpásnuvvat Sáme guovlojda 

Konferánssa l vuostatjin sámeskåvlåj ja mánájgárdij pedagogajda, valla konferánssa hiehpá aj skåvllåæjgádijda, PP-dievnastussaj, mánájgárde- ja skåvllårádevaddijda jna. Tiemá li vijdes pedagogalasj vuojnos, gånnå dættodip sámemánájada ja nuorajda. Konferánsav le vejulasj nehta baktu tjuovvot.  

Sáme sierrapedagogalasj værmádahka (SEAF) doallá fáhkabiejvijt. Sámedigge, Statped ja Sáme låhkåmguovdásj ruhtadi fáhkabiejvijt. Værmádagá ulmme l nannit ja åvdedit pedagogalasj máhtudagáv – ávkken sámegielak mánájda, nuorajda ja ållessjattugijda. Duodden åvddånahttá værmádahka oahpponævojt ja guoradallamnævojt sáme addnijda, ja nanni ja åvddånahttá máhtudagáv sámegielan ja sámegiellaj.