Til hovedinnhold

Sámegiella ja mearkagiella vuosttašgiellan

Oahppit geain leat gullanváttut sámi guovlluin sáhttet oažžut sihke sámegiela ja mearkagiela vuosttašgiellan, eai dárbbaš válljet eret sámegiela vuosttašgiellan.

Gitta 2015 giđđii ii leat leamaš vejolašvuohta ahte lea sihke sámegiella ja mearkagiella vuosttašgiellan. Dat lea dagahan váttisin skuvlii hálddašit áššiid main leat bealjehis sámi mánát. Mánáid ovddasteaddjit leat šaddan válljet sámegiela eret vuosttašgiellan mearkagiela ovdii.

Dál čállá Oahpahusdirektoráhta johtočállosis "Fága- ja diibmojuohkin ja fálaldatstruktuvra Máhtoloktemii Udir-1-2015»" ahte oahpput sáhttet oažžut oahpahusa sihke mearkagillii ja sámegilli vuosttašgiellan.

Oahpahusdirektoráhta čilge ahte nuppástusa vuolggasadji lea ahte oahppi čuovvu mearkagiellaoahpahusa vuođđoskuvllas, muhto leat liige diimmut sámegiela oahpahussii.

– Ovdamunni lea ahte sámegielat ja dárugielat oahppit ožžot seamma vuoigatvuođaid. Dat mii ii leat nu buorre lea ahte sáhttet šaddat oalle ollu diimmut ohppiide, dadjá Bente Heian, Oahpahusdirektoráhta seniorráđđeaddi.