Statpeden ulmieguvvie 2012-2016

Bïevn St.nr. 18 jarkelimmiem Statpedeste buerkeste. Akte vihkeles aalkoe våaroemasse lea Midtlyngs-moenehtsen raeriestimmie. Moenehtsen mandaate lij goerehtidh guktie maahta lïerehtimmiefaalenassem maanide, noeride jïh geerve almetjidie bueriedidh, mah sjïere viehkiem jïh dåarjoem daarpesjieh. Dej vihkielommes teemaj gaskem lij guktie barkoelaavenjassh jïh barkoejoekedimmie ektievoeti gaskem Statpedesne jïh pedgogeles-psykologeles dïenesjisnie (PP-dïenesje) juakasuvvieh.

Bïevn St. nr. 18 raeriestimmine Midtlyng-moenehtsistie vijriesåbpoe barka, gusnie Statpeden maahtoejarngh jeehtin lij daerpies tjïelkestidh mah daerpiesvoeth jïh dåarjoeh Statped maahta jïh byöroe gorredidh, jïh maam maanagïerte, skuvle jïh PP-dïenesje jïjtje byöroeh gorredidh.

Gosse tjïelth jïh fylhkentjïelth dåarjoem daarpesjieh, dellie daamtaj maanaj jïh noeri bïjre mah gellielaaketje daerpiesvoeth utnieh. Jis edtjin bïhkedimmiem åadtjodh ovmessie faagesuerkine dellie tjïelth jïh fylhkentjïelth tjoerin jïjnjh ovmessie jarngine govlehtalledh. Midtlyng-moenehtse vïenhti daate faalenassestruktuvre idtji sjïehth gosse edtji maanaj, noeri jïh geerve almetji gellielaaketje daerpiesvoeth gorredidh. Moenehtse aaj vuesiehti lij daerpies Statpdem jarkelidh juktie ellies jïh iktedamme dïenesjh buektiehtidh.

Man åvteste lij daerpies Statpedem jarkelidh maahta naemhtie buerkiestidh:

• seamma nuepieh Statpeden dïenesjh åadtjodh tjïeltide jïh fylhkentjïeltide (lïhkebisnie)
• elliesåbpoe goerkese gïeh leah Statpeden utnijh
• elliesåbpoe strategije juktie bijjiemaahtoem evtiedidh jïh nuhtjedh
• tjïelke veanhtadimmieh Statpedese goh akte 3-linjadïenesje
• tjïelkebe profijle utniejidie jïh barkijidie

Midtlyng-moenehtsen minngesne Bïevn. St. 18 bööti, gusnie bïhkedasside vihtiesti guktie edtja Statpdem jarkelidh jaepien 2016 vööste. Statped lea stillemem åådtjeme bïhkedassigujmie Bïevnesisnie St.nr. 18. vijriesåbpoe barkedh. Daate gaskem jeatjah dorjesåvva signaligujmie daennie ulmieguvvesne.