TD Snap Core First
TD Snap Core First lea ollislaš gulahallanreaidu mas leat gráfalaš symbolat, sin várás geat dárbbašit Molssaevttolaš ja lassi gulahallanvuogi (MLG).
TD Snap Core First
Buot agi olbmuide geat dárbbašit MLG
Gulahallat eará ládje go hupmangielain gohčoduvvo Molssaevttolaš ja lassi gulahallanvuohki (MLG). TD Snap Core First lea ollislaš gulahallanreaidu mii addá vejolašvuođa gulahallat gráfalaš symbolaid bokte, dál maiddái davvisámegillii.
Sámegielat veršuvnnas leat badjelaš 13000 symbola. Juohke symbola lea čadnon sátnái, frásii dahje cealkagii. Prográmmas lea sámegielat hupmansyntesa, sihke nisson- ja dievdojietna. Dat mielddisbuktá ahte daid boaluid maid deaddila prográmmas, dadjojit sámegillii dahkkonjiena bokte.
Prográmma sáhttá heivehit ovttaskas dárbbuid mielde. Das sáhttá ovdamearkka dihte redigeret boaluid, čiehkat ja lasihit symbolaid, báddet jiena, justeret siidosturrodaga ja ráhkadit sierra siidduid.
Badjelaš 250 ođđa PCS-symbola čadnon sámi kultuvrii
Prográmmas lea PCS-symbolat. PCS (Picture Communication Symbols) lea čoakkálmas standardiserejuvvon gráfalaš symbolain mat geavahuvvojit doarjjan gulahallamii ja giellaovdáneapmái. PCS lea eanemus geavahuvvon symbolačoakkálmas máilmmis, maiddái Norggas.
Sámegielat veršuvnnas leat badjelaš 250 ođđa PCS-symbola mat leat čadnon sámi kultuvrii ja gillii. Dát gusket earret eará árbevirolaš mállásiidda, sámi čiŋaide, boazodollui, sámi historjái, stohkosiidda muohttagis, murjemii, suidnemii, guolásteapmái, lávostallamii, meahcástallamii ja Davvi-Norgga lundui.
10 ođđa fáddásiiddu
Dasa lassin leat sámegielat veršuvnnas lassin 10 fáddásiiddu čadnon sámi kultuvrii ja gillii, earret eará sámi álbmotbeaivi, giellavahkku, lávostallan ja oaggut jieŋa alde.
Geahča filmmaid sámegielat veršuvnna birra
Fuomášumit geavaheapmái
- Tobii Dynavoxa neahttasiidduuin gávdnojit eanet dieđut prográmma birra, doppe lea earret eará Geavaheaddjebagadus (dárogillii).
- Tobii Dynavoxas lea maid Youtube-kanála gos gávdnojit máŋga filmma prográmma birra (dárogillii). Filmmat leat earret eará dan birra movt redigeret prográmmas ja iešguđetlágan funkšuvnnaid birra prográmmas.
- Loga PCS-symbolstart birra maid, dan lea vuogas geavahit ovdal go geavahišgoahtá TD Snap Core First prográmma.
- Loga eanet MLG birra sámegillii diehtogihppagis maid Statped ja ISAAC leat ráhkadan. Muđui gávdno eanet diehtu MLG birra dárogillii Statpeda neahttasiidduin.
Funkšuvnnat
Go leat viežžan sámi siidduid, de fertet viežžat sámi jienaid, Elle ja Biera.
Ollislaš veršuvnna sáhttá oažžut guovtti vuogi mielde:
- Veahkkeneavvun Tobii Dynavox:as. Dalle čuvvot guokte liigelinseanssa, vai sáhttá geavahit TD Snap hupmansyntesain olles 3 ovttadagain.
- Oastit appa AppStore:as.
Dárogillii Tobii Dynavox Norge. Prográmma lea jorgaluvvon ja heivehuvvon sámegillii Sámi erenoamášpedagogalaš doarjalusa (SEAD) bokte. Prošeaktajoavkkus ledje Lone Nergård Boine, Marit Inger Pulk, Solveig Kristine Oskal ja Bente Martinsen bokte, ovttasbargguin Tobii dynavoxain.
Sámediggi lea resurssaid juolludemiin dahkan vejolažžan čađahit dán prošeavtta.
Guoskevaš resurssat
PCS-symbolaálgu
PCS-symbolaálgu lea oassi gulahallanreaiddus TD Snap. Dan lea vuogas geavahit vuosttaš lávkin go galgá oahpásmuvvat ja geavahišgoahtit MLG …
Ii go mu mánná hállagoađe fargga? Ale vuordde ja geahča!
Dán gihppagis leat dieđut dan birra mii molssaevttolaš ja lassi gulahallanvuohki (MLG) lea, manne dat lea dehálaš ja movt don s�ht�t …
Mearka
Mearka app lea mearkasátnegirji davvisámegillii. Web-appas leat 1255 mearkka oktan sániiguin davvisámegillii.