Låhkåm- ja tjállemváttesvuoda

Låhkåm- ja tjállemváttesvuoda l aktisasj nammadus iesjguhtiklágásj hásstalusájda låhkåmin ja/jali tjállemin. Muhttijn li gássjelisvuoda kåvddit bokstávajt bágojda ja gárgadisájda, iehtjádijn vas li gássjelisvuoda dádjadit majt javlli, ja muhtema vas rahtji goappátjij. Dysleksijja vuoset sierralágásj gássjelisvuohtaj oahppat biektelit dekåvddit bágojt, ja mav ij máhte ållåsit tjielggit hæjos fámoj, vuojnno- jali gullováttoj.

Suláj juohkka vidát oahppen skåvlån li hásstalusá låhkåt ja tjállet. Gaskan 5–8 prosentan la dysleksijja. Dat merkaj ihkap nágin oahppe juohkka klássalanján dårjav dárbahi.

Låhkåm ja tjállem li vuodotjehpudagá ma vargga divna fágajn aneduvvi. Danen dán suorge gássjelisvuoda vájkkudi skåvllåárggabiejve moatte bælláj. Båhtusa máhtti sjaddat vuollegis háldadimdåbddo, hæjos motivasjåvnnå ja nievret soapptsu. Danen buorre doarjja ja hiebadibme viek mierredi. 

Skåvlån bierri tjuovvot oahppijt gudi låhki nuolet, slintsot jali álu boasstot tjálli. Muhttijn aj oahppe duolla låhki, valla e sisanov dádjada. Kárttim, ájttsam ja lahka aktisasjbarggo åvdåstiddjij ja ihkap PP-dievnastusájn, li ájnnasa gå galggá váttesvuodajt ielvvet ja tjuovvolit.

Árra viehkke ja buoragit hiebadit li ájnnasa. Máná ja oahppe gej li låhkåm- ja tjállemváttesvuoda, dárbahi sihke åhpadusáv dan hárráj majna rahtji ja vædtsagijt ma gássjelisvuodajt buohttiji – dagu hållamsyntiessa, jiednagirje, tjállemdárkestibme ja diktierim. Ájnas la vaddet sajev ietjá vuogijda oahppat ja máhtov vuosedit – dagu njálmálasj gæhttjalime, gåvå jali filma. Ulmme l divna oahppe galggi oadtjot máhttelisvuodav vuorbástuvátjit ja rijbadittjat.