Lohkan- ja čállinváttisvuođat

Lohkan- ja čállinváttisvuođat lea oktasašnamahus iešguđetlágan hástalusaide lohkamis ja/dahje čállimis. Muhtumiin leat váttisvuođat kodet bustávaid sániide ja cealkagiidda, earáin fas leat váttisvuođat ipmirdit maid lohket, ja muhtumat fas rahčet goappašagaiguin. Dysleksiija čujuha erenoamáš váttisvuhtii oahppat beaktilit dekodet sániid, ja man ii sáhte ollásit čilget heajos návccaiguin, oaidno- dahje gullováttuiguin.

Sullii juohke viđát oahppis skuvllas leat hástalusat lohkamis ja čállimis. Gaskal 5–8 proseanttas lea dysleksiija. Dat mearkkaša ahte leat várra máŋga oahppi juohke luohkkálanjas geat dárbbašit doarjaga.

Lohkan ja čállin leat vuođđogálggat mat geavahuvvojit measta buot fágain. Váttisvuođat dán suorggis čuhcet dan dihte máŋgga beallái skuvlaárgabeaivvis. Dát sáhttá mielddisbuktit vuollegis hálddašandovddu, heajos motivašuvnna ja ahkiduššama. Buorre doarjja ja heiveheapmi leat danne mearrideaddjin.

Skuvllas berre giddet fuomášumi ohppiide geat lohket njozet, eahpedárkilit dahje čállet ollu meattáhusaiguin. Sáhttet maid leat oahppit geat lohket riekta, muhto eai ipmir sisdoalu. Kárten, áican ja lagaš ovttasbargu ovddasteddjiiguin ja vejolaččat PP-bálvalusain, leat dehálaččat go galgá fuobmát ja čuovvolit váttisvuođaid.

Árraveahkki ja buorre heiveheapmi leat dehálaččat. Mánát ja oahppit geain leat lohkan- ja čállinváttisvuođat, dárbbašit sihke oahpahusa das mainna rahčet ja reaidduid mat buhttejit váttisvuođaid – nugo hupmansyntesa, jietnagirjjiid, čállindárkkisteami ja dikterema. Lea dehálaš addit saji eará vugiide oahppat ja čájehit máhtu – nugo njálmmálaš geahččalemiide, govaide dahje filmmaide. Mihttomearrin lea ahte buot oahppit galget oažžut vejolašvuođa lihkostuvvat ja vásihit hálddašeami.