Heiltidsopplæring for elevar med medfødd døvblindskap

Gatedresse

Gamle Hovsetervei 3 i Oslo.

Postadresse

Diamanten skole for elever med døvblindhet
Statped postmottak
Postboks 113
3081 Holmestrand

Telefon

484 05 390 / 484 05 956

Rektor

Hege Kristine Høgmo

996 45 264
[email protected]

Diamanten skole for elevar med døvblindheit er ein del av det statlege spesialpedagogiske opplæringstilbodet som skal bidra til at barn, unge og vaksne med særskilde opplæringsbehov får moglegheit til å vere aktive deltakarar i eiga læring og utvikling. Tenesta som blir gitt til elevane ved skolen, er forankra i opplæringslova kapittel 11 om tilpassa opplæring og individuell tilrettelegging (lovdata.no).

Skolen gir undervisning på grunnskole- og vidaregåande nivå for elevar med døvblindheit, med eit særleg fokus på kroppsleg og taktil kommunikasjon.

Diamanten skolen sitt felles verdigrunnlag tek utgangspunkt i eit mangfaldsperspektiv. Skolen skal skape vilkår som gjer elevane handlekraftige og robuste på sin eigen måte. Skolen har som mål å vere ein inkluderande arena, der det blir gitt likeverdige moglegheiter. Inkludering og deltaking er viktige satsingsområde for ei kontinuerleg utvikling av sjølvstende, eit godt sjølvbilde og god livskvalitet. Målet er at elevane skal få utvikle dei sterke sidene sine og få moglegheit til å bli den beste versjonen av seg sjølve.

Det er den pedagogisk-psykologiske tenesta i kommunen/fylket som tek stilling til om ein elev treng individuelt tilrettelagd opplæring. Dersom eleven også treng personleg assistanse eller fysisk tilrettelegging, skal den sakkunnige vurderinga gi ei heilskapleg vurdering av kva slags tilrettelegging eleven treng.

FNs barnekonvensjon legg vekt på retten til å uttrykkje seg og å bli høyrd (artikkel 3). Vårt pedagogiske grunnsyn tek utgangspunkt i samspelspedagogisk tenking og legg vekt på å fremje barnet si eiga stemme.

Kommunikasjon og språk i taktil modalitet er overordna i all undervisninga vår. I tillegg blir individuelt tilpassa alternative og supplerande kommunikasjonshjelpemiddel (ASK) nytta.

Prinsippa våre er at elevane skal få ei reell oppleving av å bli sett, bekrefta, forstått og få moglegheit til å uttrykkje seg med eigne uttrykk, slik at dei gjennom kommunikasjon med andre kan påverke sin eigen situasjon.

Alle elevane ved skolen har kombinerte sansetap, der føresetnadene til den enkelte for å nyttiggjere seg eventuell syns- og høyrselsrest vil variere mykje. Behova til kvar elev vil vere svært ulike i ein opplæringssamanheng der ein legg vekt på fag og satsingsområde ulikt, ut frå sakkunnig vurdering.

Undervisninga blir tilpassa den enkelte eleven ut frå kompetansen, motivasjonen, interessa, typen og omfanget av sansetapa og eventuelle tilleggsvanskar. Med bakgrunn i ei heilskapleg forståing av elevane og lærarane sin spesialiserte partnarkompetanse utviklar skolen individuelle læringsplattformar. Desse læringsplattformane blir utarbeidde gjennom diagnostiserande undervisning som er utvikla i tverrfaglege team.

Skolen tek utgangspunkt i eit relasjonelt perspektiv, der samhandling, tilknyting og tillit står sentralt. Leik, samhandling, nærleik, varleg innleving, utforsking og kategorisering er sentrale element for å utvikle kommunikasjon. Ei relasjonell forståing legg til grunn at opplæringa må tilpassast elevane slik at samspelet fungerer betre og gir vekstvilkår.

Elevane ved skolen har kombinerte sansetap, og den kroppslige og taktile modaliteten er derfor hovudkanalen i samband med læring, informasjons­innhenting, kommunikasjon, orientering og mobilitet.

Innhaldet i undervisninga omfattar tidleg og høgt spesialisert intervensjon, med vekt på å utvikle kommunikasjon, moglegheiter for å få tilgang til informasjon, fri rørsle, orientering og mobilitet. Undervisninga er lagt til rette med tanke på følgande:

• Tilrettelegging av det sosiale og fysiske miljøet.
• Eit profesjonelt læringsmiljø som kan fange opp dei lågt lesbare uttrykka til eleven, bekrefte og vere nysgjerrig på viljen, intensjonane, tankane, kjenslene og meiningane til eleven. Dette for å styrke opplevinga til eleven av seg sjølv, med eiga handlekraft som kan påverke eigne omgjevnader. Dette er stemmen til barnet.
• Opplæring i ferdigheiter i dagleglivet (ADL) og utvikling av sjølvstende.
• Førbegynnande lese- og skriveopplæring, romleg forståing av tal, rom og form.
• Lese- og skriveopplæring som er tilpassa sansetapet (tohandsalfabet, punktskrift).
• Undervisning som legg vekt på leik, samspel, utforsking og varleg innleving, og som utviklar kommunikasjon basert på dei ibuande uttrykka og føresetnadene til eleven.
• Kroppsleg, taktil nærleik og posisjonering som gir moglegheiter for kommunikasjon. På den måten kan eleven kjenne, oppfatte og forstå nærværet og intensjonen til den andre og få tilgang til gode utviklings- og læringsvilkår.

Skolen tar utgangspunkt i dei ordinære læreplanane i fagfornyinga (udir.no). Det blir utarbeidd individuelle opplæringsplanar (IOP-ar) når ein elev har fått vedtak om dette.