Touchmetoden
Her kan du lese om korleis barn og elevar som er blinde eller sterkt svaksynte, kan lære seg touchmetoden.
For elevar med synsnedsetjingar er det viktig å kunne skrive med touchmetoden. Når eleven ikkje treng å sjå på tastaturet, blir skrivinga meir effektiv og mindre anstrengande. Det vil hjelpe eleven med å fokusere meir på innhaldet og mindre på sjølve skrivinga.
Kva er touchmetoden?
Målet er å kunne skrive mens du ser på skjermen i staden for å sjå på tastaturet. Touchmetoden er ein måte å skrive på tastatur der kvar finger har faste tastar. Fingrane ligg fast plassert og blir berre flytta kort veg.
Slik plasserast fingrane:
- Venstre hand ligg på tastane F, D, S og A
- Høgre hand ligg på tastane J, K, L og Ø
- Tomlane kviler på mellomromstasten
Slik finn du dei andre tastane:
Fingrane startar på desse tastane og strekker seg til tastane over og under når du skriv. Etterpå går fingrane alltid tilbake til utgangsposisjonen, eller det som ofte blir kalla leietastane.
Tastane F og J har små merke som kan kjennast med fingrane. Desse gjer det lettare å finne rett plass utan å sjå. F og J kan gjerast endå enklare for elevar med nedsett syn å finne ved å markere dei meir synleg og taktilt, for eksempel med ein tapebit eller eit klistremerke.
Fargekoding for fingerplassering
Dette er eit forslag til fargekoding for hva slags fingrar som styrer dei ulike tastane:
Inkluderande opplæring i touchmetoden
Aktivitetar i innlæringa av touchmetoden kan gjerast i heil klasse som ein inkluderande aktivitet, for eksempel i stasjonsarbeid, som oppstartsaktivitet eller som avslutning på dagen. LK20 inneheld mål om tastaturet i norsk etter 2., 4. og 7. trinn og er dermed kompetanse alle elevar skal nå.
Her er tips til opplæringa:
- Start opplæringa tidleg og gjennomfør ho jamleg, slik at eleven etablerer gode vanar frå starten av.
- Bruk korte økter – gjerne 10–15 minutt om gongen – fleire gonger i veka, sidan øving kan vere krevande.
- Unngå lange pausar i opplæringa. Fortset øvinga til eleven meistrar alle tastane, også dei som blir brukte sjeldan.
- Sørg for rikeleg mengdetrening slik at ferdigheitene blir automatiserte og stabile, for eksempel som heimearbeid.
Tastaturtreningsprogram
Tastaturbo
Tastaturbo er eit gratis verktøy utvikla av Statped for begynneropplæring i touchmetoden. Verktøyet er i utgangspunktet laga for elevar på barneskolen, men passar også godt for andre som skal lære å skrive med touchmetoden.
Opplæringa består av enkle øvingar som kan brukast av alle i klassen. Målet med øvingane er at eleven skal oppnå ein skrivehastigheit på 45 teikn i minuttet. Før oppstart blir det anbefalt at læraren les i rettleiaren for lærarar og set seg inn i korleis programmet blir brukt.
Tastaturbo er plattformuavhengig og kan brukast i alle nettlesarar. Det er ikkje behov for verken nedlasting eller innlogging.
Tastaturbo
TangoTouch
TangoTouch er eit program for å øve på tastaturbruk i Windows 10 og 11. Meir informasjon finst på provista.no.
Forslag til aktivitetar for å nå opplæringsmål
Sjå Udir sine forslag til opplæringsmål for tekniske hjelpemiddel: Opplæring i punktskrift, tekniske hjelpemidler og mobilitet | udir.no
Gå gjennom trinna saman med eleven, og la eleven sjølv utføre handlingane.
- Det er ein fordel at elevane kan skilje mellom høgre og venstre hand, og at dei kjenner til namna på fingrane. Sjekk dette før de startar med tastaturtrening.
- Snakk om tastaturet og korleis det er bygd opp. Forklar kva QWERTY betyr, kvifor nokre tastar har fleire teikn, og kva dei ulike funksjonstastane heiter. I lærarrettleiaren til Tastaturbo finst det ei kort forklaring på kvifor bokstavane er plasserte slik dei er.
- Opne eit tomt dokument. Gå gjennom rett fingerplassering og korleis kvar finger har ansvar for bestemte tastar. Be deretter eleven skrive enkle bokstavar. Start med tastane på leielinja. Etter kvart kan øvinga gjerast meir motiverande ved å ta tida.
- Bruk tastaturtreningsprogrammet Tastaturbo jamleg, for eksempel som ein fast oppstartsaktivitet, i stasjonsarbeid eller som heimearbeid.
- For å bli raskare i touch må eleven øve mykje. Det finst fleire treningsprogram på nett som kan måle kor fort eleven skriv.
- Hastigheita kan også testast på andre måtar. For eksempel kan eleven skrive i ei avgrensa tid og sjå kor mykje tekst som blir skrive. Skriveprogram kan telje ord og teikn. Du kan også måle kor lang tid det tar å skrive eit avsnitt. Eleven bør vere med og sette seg mål for kor hurtig han eller ho ønsker å skrive.