Dynámalaš kártengeahččaleapmi matematihkas

• Bagadus
• Bargoárkkat oahppái (ohppiidgihpa)
• Noterengihpa kártenjođiheaddjái
• Luohkáide 1.-5. leat maid govat maid galgá čálihit

Dát kártengeahččaleapmi lea jurddašuvvon oahpaheddjiide geat dáhttot kártet ohppiid geat rahčet matematihkain, vai nákcejit fállat daid ohppiide buori, heivehuvvon oahppofálaldaga fágas.

Ovdal go skuvla váldá atnui kártenávdnasiid, de ferte sihkkarastit ahte son guhte galgá kártet, lea oahpaheaddji geas lea nana gelbbolašvuohta das movt mánát ja nuorat ohppet matematihka.

Oassi dán mállet kárteniskkadeami dynamihkas lea ahte kártenjođiheaddji doarju oahppi, dan láhkái ahte ii aktiivvalaččat hábme čovdosiid dahje čilge, muhto nu ahte geažida dan láhkái ahte veahkeha oahppi iežas jurddašit, dávjá geažida gažaldaga hámis. Seammás hástaluvvo oahppi gaskkustit movt son ieš jurddaša guđege bargamuša čoavdima oktavuođas.

Kártengeahččaleapmi lea dan meare viiddis ahte dan berre juohkit máŋgga oassái ja čađahit dan guhkebuš áiggis.

Ovdal go álggaha kártengeahččaleami, de galgá čilget oahppái manne geahččaleami áigu čađahit. Dynámalaš kártema ulbmil lea nákcet ráhkadit nu buori heivehuvvon oahpahusa go vejolaš matematihkas. Jus dainna galgá lihkostuvvat, de ferte oažžut čielgasii oahppi gelbbolašvuođa, movt oahppi resonnere ja mii dagaha ahte son cohkko. Danin berre ge ráhkkanahttit oahppi dasa movt galgá čilget dahje earaláhkái čájehit mo son jurddaša.