Lohkeme- jïh tjaelemetsagkesh

Lohkeme- jïh tjaelemetsagkesh lea ektie dïejvese ovmessie haestiemidie lohkeminie jïh/ jallh tjaelieminie. Muvhth tsagkesh utnieh bokstaavh baakojde jïh raajesidie kodadidh, jeatjebh tjebrieh guarkedh maam luhkieh, jïh muvhth gåabpaginie tjebrieh. Dysleksije lea sjïere tsagkese radtjoes baakoeavkodadimmiem lïeredh, mij ij leah viesjies maahtoenjieptjien, vuejneme- jallh govlemetsagkesi gaavhtan.

Ovrehte akte vïjhte learoehkijstie skuvlesne, haestemh utnieh lohkeminie jïh tjaelieminie. Gaskem 5–8 % dysleksijem utnieh. Dïhte sæjhta jiehtedh jienebh learohkh fïerhtene klaassetjiehtjelisnie seapan dåarjoem daarpesjieh.

Lohkeme jïh tjaeleme vihkielommes maehtelesvoeth mah mahte gaajhkine faagine åtnasuvvieh. Tsagkesh daennie suerkesne gellie bielieh skuvleaarkebiejjeste baajnehtieh. Maahta vuelegs haalvemedomtesem åadtjodh, nåake skraejriem damtedh jïh ij tråjjadidh. Hijven dåarjoe jïh sjïehteladteme dan åvteste eevre vihkeles.

Skuvlesne byöroe tsåatskeles årrodh learoehkidie mah soejmetji luhkieh, ij dan veelelaakan luhkieh, jallh gellie baakoeh båajhtoehlaakan tjaala. Maahta aaj learohkh årrodh mah reaktoelaakan luhkieh, men mah eah sisvegem guarkah. Goerehtalleme, vïhtesjadteme jïh lïhke laavenjostoe åeliealmetjigujmie jïh mejtie aaj PPD:ine, leah vihkele ihke tsagkesidie gaavnedh jïh bæjjese fulkedh.

Aareh barkoe jïh hijven sjïehteladteme eevre daerpies. Maanah jïh noerh lohkeme- jïh tjaelemetsagkesigujmie, dovne lïerehtimmiem daarpesjieh dejnie mejgujmie tjebrieh, jïh dïrregh mah maehtieh tsagkesidie viehkiehtidh – goh soptsestimmiesyntese, tjoejegærjah, staavadimmiegïehtjedimmie jïh dikteereme. Vihkeles nuepiem vedtedh jeatjah vuekieh nuhtjedh gosse lïeredh jïh daajroem vuesiehtidh – goh njaalmeldh pryövh, guvvieh jallh filme. Ulmie lea gaajhkh learohkh edtjieh nuepiem åadtjodh læhkadidh jïh haalvemem dååjredh.