Om Statped
Statped yter tenester for barn og elevar som treng varig og omfattande tilrettelegging i barnehage og skole. Vi hjelper PPT med tenester og kompetanseutvikling, gir opplæring i og på norsk teiknspråk og produserer læremiddel og materiell.
-
Organisasjon Statped er eit tenesteytande fagdirektorat under Kunnskapsdepartementet. Slik er vi organiserte.
-
Tenestene våre Statped tilbyr tenester for barn, elevar og laga rundt dei, samiskspråklege, organisasjonar og UH-sektor. Her kan du bli kjend med tenestene våre.
-
Brukarmedverknad Statped har seks brukarråd som fremmar brukarperspektivet i strategisk viktige saker og prosessar. Les meir om brukarmedverknad og årsrapportar her.
-
Strategiar Her finn du Statpeds strategiar som omhandlar våre ulike innsatsområdar.
Statped arbeider for at barn og elevar med særlege opplæringsbehov skal få eit heilskapleg pedagogisk tilbod, der kompetansebyggande og inkluderande tiltak, læremiddelutvikling og teiknspråkopplæring heng godt saman med det allmennpedagogiske tilbodet.
Statped er Noregs største kompetansemiljø for spesialpedagogikk, teiknspråk og tilrettelagde læremiddel.
Omgrepet «elev» inkluderer vaksne i opplæring og lærlingar.
Lik kvalitet og tilgang
Oppgåva vår er å bygge og halde spisskompetanse ved like på fagområde der utfordringane er så sjeldne eller komplekse at kommunar og fylkeskommunar ikkje kan ha nødvendig kompetanse. Rådgivarane våre reiser ut til kommunen der barnet eller eleven bur. På den måten sikrar vi at dei får same høve som andre til å lære, utvikle seg og delta i eit inkluderande fellesskap.
Gjennom spør oss-tenesta vår drøftar og rettleier vi også på telefon eller e-post om spesialpedagogiske utfordringar med eit heilskapleg og fleirfagleg blikk.
Statped tilbyr tenester innanfor områda syn, høyrsel, kombinerte syns- og høyrselstap, døvblindheit, samansette lærevanskar, språk og tale, alternativ og supplerande kommunikasjon (ASK) og erverva hjerneskade. Tenestene våre er ofte tverrfaglege fordi mange barn og elevar har komplekse utfordringar.
Teiknspråk og samisk
Vi tilbyr teiknspråkopplæring for elevar med nedsett høyrsel og teiknspråkkurs for foreldra og søskena deira. I tillegg har vi kurs for tilsette i barnehagar og skolar. Statped har eit tilbod om grunnskole og vidaregåande skole for elevar med medfødd døvblindheit ved Diamanten skole i Oslo.
Statped tilbyr landsdekkande spesialpedagogiske tenester innan alle fagområde til samiske barn og elevar, på både nord-, lule- og sørsamisk samt norsk, gjennom den samiske spesialpedagogiske tenesta vår.
Kunnskapsutvikling
Vi utviklar, legg til rette og produserer læremiddel og pedagogisk materiell for teiknspråklege, blinde og sterkt svaksynte.
Statped bidrar til utdanningar og forskingsbasert kunnskapsutvikling innanfor fagområda våre ved universitet og høgskolar.
Vi gir faglege råd til Kunnskapsdepartementet i saker som gjeld barn og elevar med særskilde opplæringsbehov. Vidare systematiserer vi kunnskapen vår for å bidra til politikkutvikling og forvaltning.
Kunnskapsdepartementet styrer Statped gjennom årlege tildelingsbrev (regjeringa.no).
Årsrapportar
Årsrapporten ser attende på året som har gått. Ho er ei melding til Kunnskapsdepartementet over aktivitetane våre, resultat og prioriteringar, og korleis vi har løyst oppgåvene vi fekk i tildelingsbrevet frå dei.