Sju enkle grep i klasserommet – til støtte for elevar med språkforstyrringar
Elevar med språkforstyrringar treng tidleg støtte så snart språkvanskar blir oppdaga. For å hjelpe dei best mogleg, er det viktig med individuelt tilpassa hjelp basert på behova til kvar enkelt.
Lærarar kan gjere mange enkle tilpassingar i klasserommet som støttar elevar med språkforstyrringar – og som samtidig gagnar alle elevar. Barn med språkforstyrringar treng systematisk støtte for å forstå omgrep og tileigne seg kunnskap. Språklege aktivitetar og arbeid med omgrep er nyttig for heile elevgruppa.
Sju enkle grep du som lærar kan gjere i klasserommet
- Bruk bilete, praktiske døme, filmsnuttar, ordbilete, fargar, symbolsystem, tankekart og illustrasjonar for å støtte forståinga til elevane av fagstoffet, og dessutan omgrepslæring. Elevar med språkforstyrringar har behov for å bruke både syn, høyrsel og leseferdigheiter for å lære nye omgrep. Visuell støtte bidreg til ei auka forståing for det som blir gjennomgått i klasserommet.
- Hjelp elevane med å finne fram bakgrunnskunnskapane dei har om tema som blir gjennomgått i klasserommet. Dette vil auke forståinga og gi elevane «mentale knaggar» til å hengje nytt lærestoff på. Ver medvite kva forkunnskapar som kan vere nyttige, for å forstå mest mogleg av lærestoffet som blir presentert. VØL-skjema kan vere ein praktisk måte å aktivere forkunnskapane.
- Mange repetisjonar er nødvendig for at elevar med språkforstyrringar skal tileigne seg lærestoff (som omgrep og språklege uttrykk) på ein sikker og grundig måte. Repetisjonane kan gjerne gjerast på ulike måtar og involvere fleire sansar.
- Elevar med språkforstyrringar profitterer på struktur og føreseielegheit i skuledagen. Du kan hjelpe dei med dette ved å til dømes ha ei tydeleg innleiing til kvar time, der du fortel kva som skal skje i løpet av økta, og kva som kjem etterpå. Visuelle dagsplanar med fag og pausar i rett rekkjefølgje, på ein synleg stad i klasserommet, kan vere gunstig for alle elevane.
Elevar som ikkje kan lese, må ha ein dagsplan med bilete som representerer hendingane gjennom dagen. - Det er viktig å ta seg god tid til å forklare for elevar med språkforstyrringar. Dei har gjerne behov for at du snakkar i eit langsamare, men framleis naturleg tempo. Ta deg tid til å sjekke om elevane har forstått det som har blitt forklart, ved å stille oppfølgingsspørsmål og snakke med dei. Elevane med språkforstyrringar kan også ha behov for å bruke lengre tid på å levere eigne svar på både munnlege og skriftlege oppgåver. Gi dei den tida dei treng på å svare.
- Det er viktig å vere klar over kva for eit språkleg nivå du legg deg på når du snakkar med elevar med språkforstyrringar. Språket bør vere lett, men ikkje barnsleg, og tilpassa alderen til eleven. Tenk minste felles multiplum: Kor enkelt kan eg forklare noko, utan å miste essensen av det eg vil seie?
- Omgrep blir danna over tid, og orda får den endelege meininga si ut frå den konteksten dei blir brukte i. Jo fleire og meir varierte døme du bruker, jo betre vil elevane kunne forstå ordet. Visuell støtte er allereie nemnd, men nokre omgrep kan også presenterast på ein praktisk måte. Det er viktig å utdjupe meininga til omgrepa ved å demonstrere døme på bruk av ordet.
Usikker på noe?
Statpeds spør oss-tjeneste er et lavterskeltilbud for deg som trenger råd om spesialpedagogikk. Vi snakker mest med folk i PP-tjenesten, men barnehager, skoler og andre kan også ta kontakt. Er du foresatt og lurer på hvordan støttesystemet fungerer, hjelper vi deg gjerne.
Dette kan være nyttig for deg
Visuell støtte i skolen
Visuell støtte kan være viktig i tilretteleggingen for elever med DLD. Det kan bidra til å skape struktur og forutsigbarhet i hverdagen og …
Hva er typiske vanskeområder for personer med DLD?
Utviklingsmessige språkforstyrrelser er medfødt og opptrer tidlig i utviklingen. Her finner du oversikt over typiske vanskeområder.
Tiltak for barn med språklydsforstyrrelser
Språklydsforstyrrelser kan ha ulike årsaker og krever derfor ulike typer tiltak.