EYMSC – Early Years Movement Skills Checklist davvisámegillii/nordsamisk

EYMSC sisttisdoallá 23 beavválaš funktionála bargamušaid mat lea sirrejuvvon njealji kategoriijai. Čuovvovaš doaibmasuorggit árvvoštallojuvvojit:

1. Iešbirgengálggat (6 bargamuša): nuoladit ja gárvodit,boaluhit boaluid, boradit basttiin ja gáffaliin, bassat gieđaid..
2. Fiinnamotorihkalaš gálggat (5 bargamuša): Manipuleret smávva diŋggaiguin, kopieren ja manuálalaš máhttu, máhttit bláđet girjjiid, čuohppat,hukset modeallaid.
3. Obbalaš gálggat go lea joavkobargguin (5 bargamuša): Čohkkánstabilitehta,guoddit diŋggaid, lihkadit lanjas nu ahte ii guoskka olbmuide dahje diŋggaide, stivret guđe guvlui galgá.
4. Gálggat astoáiggis/stoahkanbáikkis (7 bargamuša): Stoahkanbáikki duhkorasaid geavaheapmi, spáppa hálddašit, lihkadit iešguđet ládje–viehkat, njuikut, bissehallat.

Diet leat máná beaivválaš bargamušat mánáidgárddis, ja danin leage iskanlistu ávkkálašindikáhtor mainna sáhttá árvvoštallat mo mánná nákce geavahit iežas vejolaš máhtu dan proseassas ahte heivehit birrasiid gáibádusaide iežas.
Go bargamušat leat sirrejuvvon kategoriijaide, de dat dahká vejolažžan identifiseret spesifihkka surggiid main mánná vásiha váttisvuođaid. De sáhttá dárkileappot árvvoštallat vejolaš váttisvuođaid, ja de sáhttá álggahit ávkkálaš ja ulbmillaš doaimmaid mat leat mánnái ávkin.

Iskanlistu lea ráhkaduvvon nu ahte dan sáhtát deavdit muittu mielde jus sihkkarit muittát mo mánná čađaha bargamušaid, dahje sáhtát máná áicat guhkebuš áiggi ovdal go deavddát iskanlisttu. Áicanáigodat berre leat gaskal 1-3 vahkku. Go guhkit áiggi áicá, de oaidná máná dássedis máhttinolahusa.

Sáhttá movttiidahttit máná dan áiggis go áicá dan, dakkár surggiin main mánás lea unnán hárjáneapmi dahje maid ii oro nákcemin, vai oažžu gova das mo máná ovdáneapmi manná ovddosguvlui. Reaiddut maid doaimmaid áicamis geavaha, galget heivet máná ahkái;–ovdamearkka dihte mánáid baste ja gáffal, unnit mánáide girjjit main leat garrasit árkkat, bihttáspealut mat guđege ahkahaččaide heivejit ja nu ain.