Gielda lea ásahan sierra stivrenjoavkku ja ceggen bargojoavkku "Gullanváttut" mas jođiheaddjit sihke skuvllas, mánáidgárddis ja PP-bálvalusas leat mielde.
– Lea gáibideaddji bargu mánáidgárddiide ja skuvllaide. Bargit galget sihke háhkat gullufágalaš máhtu, oahppat mearkkaid ja mearkagiela, rievdadit bargovugiid ohppiidjoavkkuin, buoridit ovttasbargorutiinnaid bargoveagas ja hálddašit hástalusaid mat šaddet gaskal sámegiela, dárugiela ja dárugielat mearkagiela, dadjá Jordheim.
Stuorra dárbu sámegielat mearkkaide
Prošeaktajođiheaddji čujuha dasa ahte giellabargu lea hui hástaleaddji. Son ohcala sierra giellaprošeavtta ovdánahttin dihte mearkkaid sámegielat dadjanvugiide maid dárugielat mearkagiella ii govčča.
– Lea dahkkon veahá bargu dán suorggis ovdal, muhto dat ii eisege govčča dárbbuid. Sámi bealjehis mearkagielat mánáin ja nuorain ja sin bearrašiin lea stuorrá dárbu sierra mearkagielat dadjanvugiide sámegielat sániide ja doahpagiidda. Sámediggi lea áiddo juolludan ruđaid ovdánahttit sámegielat mearkagiellaapp:a, lea várrogas álgu ollašuhttit gielalaš dárbbuid, oaivvilda Hilde Sundve Jorheim.