Matematihke maanagïertesne

Vierhtiepeerme Matematihke maanagïertesne edtja viehkine årrodh maanagïerten barkijidie, guktie dah vueptiestieh jïh skraejriem åadtjodh juktie buerebelaakan maanide skreejredh guktie dah sijjen matematihkeles maahtoem evtiedieh jïjtsh darjomen jïh gïelen tjïrrh. Stååkedimmie lea sïejhmemes maanan jïjtse jïjtjevyljehke darjome, men dah geerve almetjh maehtieh skraejriem vedtedh jïh maanan stååkedimmiem skreejredh.

Saemiedigkie lea beetnehvierhtiejgujmie dåårjeme. 

Mijjieh vierhtiepeermem maanagïertese ussjedamme, men darjomh aaj hijvenlaakan sjeahta maanide skuvlesne mah annje eah leah dan væjkeles matematihkine. 

Darjomekåarhth fïere guhten aamhtese gaavna, jïh desnie jïjnjh raeriestimmieh, darjomh, soptsestimmieaamhtesh, gærjah, laavlomh jïh soptsesh.  

Darjomekåarhtide golme sjïere bieline juakeme:

Dåaeriesmoerh loetedh jïh gïelegoerkese 

• Biejjieladtje haestemh loetedh, bïhkedassem goltelidh, meatan årrodh soptsestalledh. 
• Gïelegoerkese akte iemie bielie dåeriesmoereloetemisnie. Maanah tjuerieh dïejvesh guarkedh mah leah matematihkese viedteldihkie. 

Geometrijen goerkese 

• Maanah edtjieh dïejvesh damtijidh mah leah vïedteldihkie kråahpen bielide, jïh daejredh gusnie kråahpesne fïereguhte kråahpebielie lea.  
• Spatiale maehtelesvoeth evtiedidh lea seamma goh guvvieh toelhkestidh, maalline stååkedidh, dæjpeles geometrije  jïh joekehtslaakan mööledh.    
• Svihtjeme lea jievkehtimmie, koordinasjovne, motorihke, balanse vïssjelesvoete, verviesvoete jïh sifferh tjaeledh.  

Taalegoerkese 

• Guarkedh guktie taalh åtnasuvvieh. Tjuara taalegoerkesem ektiedidh maanan dæjpeles dååjrehtimmide, Taalegoerkese evtiesåvva gosse maanah jïjnjh nuepieh åadtjoeh taali bïjre soptsestidh.  
• Taalh, taaleraajroeh jïh ryökneme.